राजविराज,२० साउन। सप्तरीमा रासायनिक मलको आपूर्ति तथा वितरण प्रणालीलाई पारदर्शी र व्यवस्थित बनाउन जिल्ला प्रशासन कार्यालयले सक्रियता बढाएको छ।
प्रमुख जिल्ला अधिकारी श्याम कृष्ण थापाको नेतृत्वमा प्रशासकीय अधिकृत सन्तोष कुमार रायसहितको टोलीले आज बिहानै राजविराजस्थित सरकारी मल बिक्री केन्द्रहरूको स्थलगत अनुगमन गरेको हो।
स्थानीय किसानहरूबाट प्राप्त गुनासोलाई सम्बोधन गर्दै टोलीले कृषि सामग्री कम्पनी लिमिटेड र साल्ट ट्रेडिङ कर्पोरेशन लिमिटेडलाई मल वितरण प्रक्रियालाई थप व्यवस्थित, अभिलेखीकरणयुक्त र पूर्णतः गुनासोरहित बनाउन कडा निर्देशन दिएको छ।
अनुगमनका क्रममा मलको आपूर्तिमा हुन सक्ने कृत्रिम अभाव, कालोबजारी र अनियमितता नियन्त्रण गर्न गोप्य अनुगमन प्रक्रियालाई अझ सशक्त बनाइने जानकारी दिइएको छ। यदि कुनै व्यापारी वा निकाय कालोबजारी वा अनियमिततामा संलग्न भेटिएमा कानूनबमोजिम कडा कारबाही गरिने प्रशासनले चेतावनी दिएको छ।
साथै, प्रदेश सरकारसँग निरन्तर समन्वय गरी जिल्लामा थप मल आपूर्ति सुनिश्चित गर्न पहल भइरहेको र किसानले बिनाझन्झट सहज रूपमा मल प्राप्त गर्ने वातावरण निर्माण गर्न जिल्ला प्रशासन कार्यालय सप्तरी प्रतिबद्ध रहेको छ।
प्रतिक्रिया!!
सम्बन्धित खबर
